政壇：一舊雲口疏神憎鬼厭
白鴿黨立法會議員黃碧雲早前出席完政改早餐會後，咪大爆建仔鍾樹根點樣喺會上講《基本法》廿三條立法，話冇廿三條就冇普選嘅，但係覆述有誤。之不過，原來佢早有前科，唔單止出名係「一舊雲」，仲出晒名口疏，好似佢任監警會委員時，就漠視監警會同投訴警察課等警方代表之間嘅保密協議，喺公開會議期間大爆閉門會議討論內容，搞到神憎鬼厭，據聞就算啲委員約食飯，都指明唔可以有一舊雲在場喎！
設計圖片及對白
監警會一向對委員要求都好高，以泛民委員為例，佢哋以往都被揀過且身家清白先可以入局。加入委員會後，每位委員有既定嘅工作崗位，而對外發言亦會由指定委員負責，但自從一舊雲加入之後，委員會就有史無前例嘅事情發生喇。話說監警會定期會議除有公開畀傳媒採訪部分之外，其餘都係閉門非公開形式嘅會議，而早前佢哋討論辱警罪時，委員會同警方代表就喺閉門會議中，協定處理辱警新指引嘅內容，由於涉及警隊嘅歷史，所以一律流於內部討論，而不對外公開。
頻闖禍 白鴿訪滬唔預佢
點知一舊雲同日就喺公開會議部分霸住個面對鏡頭嘅位置，大爆指引內容，又話有關新指引應該要做公眾諮詢。最令與會者感到無奈嘅係，一舊雲隨風而來，隨風而去，當佢講完想對鏡頭講嘅說話之後，就立即離開會議室，搞到與會者想話佢都冇得出聲。
其實，一舊雲口疏闖禍已經唔係第一次，所以據聞唔單止監警會啲委員有意孤立佢，連佢啲白鴿黨友，都話唔可以畀佢隨立會去上海，同北京領導會面傾政改，因為擔心佢會後又再懶醒引述京官說話，轉個頭又可能引述錯誤喎。因此，白鴿黨人相信，如果最後決定派半數人，即黨內三名議員去上海，都冇一舊雲份。其實佢咁大個人，應該識得避重就輕，如果再加上冇乜記性嘅話，不如索性乜都唔好講，做番舊雲好過出嚟獻醜嘛！
