不愁除奸無法 只怕養虎遺患

香港「漢奸之城」有名你叫，講到極品中嘅極品，梗係自認「日日做漢奸」，「有需要就做漢奸」嘅李漢奸喇，賣國求榮都仲「理直氣壯」，問你服未！同樣級數仲有香江「搞事四人幫」另外嗰三個，咪就係淫賤黎、陳老太同埋前主教囉。

嗱嗱嗱，肥彭一到埠就急急腳約人食飯，邊個咁巴閉？原來係舊日愛將陳老太，主僕匿埋密斟唔慌有乜好嘢喇。佢兩個畀人發現時，異口同聲話，見面唔關政改、佔中事喎，你信唔信吖？

講真，回歸以來香港七國咁亂，完全係因為呢班身在漢營心在曹嘅漢奸，同外國勢力狼狽為奸，搞是搞非。有市民忍唔住發起遊行，要求港府重新就《基本法》廿三條立法，禁止漢奸走狗做埋啲出賣國家民族利益嘅勾當。有法律之劍梗係掂喇，問題係，反華勢力同香港淫賤傳媒長期妖言惑衆，社會被嚴重誤導，加上弱雞政府自顧不暇，施政搞到一頭煙，立法談何容易？

漢賊不兩立，就算廿三條立法束之高閣，唔等於呢班民族敗類永遠可以逍遙法外，為所欲為o架。喺度不妨講下歷史。抗日戰爭期間，國人對認賊作父，殘害同胞嘅漢奸恨之入骨，組織鐵血鋤奸團，連頭號漢奸汪精衞都走唔甩，差啲命都冇埋。光復之後，國民政府更展開全國大肅奸，該殺嘅殺，該關嘅關。

同樣飽受日本蹂躪嘅南韓，對做過日本人走狗嘅「韓奸」，更係窮追不捨，清算到底，國會通過俗稱反民族法嘅《親日反民族行為者財產歸屬特別法》，凡喺日據時期為殖民政府効力者，不義財產一律充公，連後人都被株連。如果香港亦照辦煮碗，設立類似法律，睇吓仲有冇人夠膽自認漢奸認得咁口爽，叮！

講開又講，香港漢奸為患，都係多得北大人夠「大量」啫。嗱，壹淫媒鼓吹「結束一黨專政」，詛咒「天滅中共」，冇受任何懲罰不特止，反而成日有賞，有中資銀行泵水支持借殼上市，連紅色根據地井岡山都奉送獨家廣告，卒之咪養肥咗淫賤黎，等佢起勁反中亂港囉。

不愁鋤奸無法，只怕縱奸為患。太一叮都係嗰句，如果北大人唔改變「反中亂港有運行，愛國愛港無前途」嘅現狀，愛國愛港只不過係齋噏，繼續話事嘅只會係漢奸餘孽，叮！