「政改大龍鳳」喺一句「一錘定音」下，大可行人止步，係咁先矣！淨係叻唔切，爭邀功而露底，賴嘢後又進退失據的澄清表現，該買定返英國祖家的機票吧！

另一個更廢柴的，是教育局長吳得掂，有記者問「一錘定音」到底點解時，佢答：「冇其他意見」。喂！全港家長及學生們，請剪存本文做證據，將來在香港考任何公開試，想攞高分，皆答「冇其他意見」吧！因學局長的，實冇衰！

不過，我點都唔明，人家問成語，咁同「冇其他意見」有乜關係呢？你不如話「再無補充」咪仲好！

香港廢柴之輩，不一定係官員，立法會議員中仲多，而且，沒有最廢，只有更廢！

日前，香港島南區海怡西區議會補選，三個候選人之中，以民主黨副主席兼立法會議員單仲偕最重秤，點知得一千票唔夠（該區有萬多名合格選民），還係包尾。事後被批評參選唔勤力，但佢唔承認！人民力量的袁彌明雖然有千多票，仍敗給有葉劉淑儀撐腰的新民黨員陳家珮！

今次的地區補選，給香港一個啟示，就係民主黨玩完了！在這個中產為主的選區，派個黨內「重量人物」（佢哋自以為咋）都包尾，預示啲乜呢？有評論說這區的中產誤信反民主、奴才主義的新民黨係「開明派」，其實，我睇到的，係「海怡中產」已畀內地土豪攻陷了！再不是「港式中產」矣！大家醒吓啦！故此，即使人力袁彌明加埋民主黨單仲偕的票數亦不及有阿公「施福」的多。若香港的「真正」在地中產，仲做沉默的大多數，只會變成「攞嚟賤」，兼令香港更崩壞、更陌生！

當呢度嘅官員和議員都廢無倫和人鬼不分時，我們應更要看清楚和站出來為自己和下一代爭取公平公正的公民投票呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android/Windows Phone Apps