城中鏡：釋永信訪庫克傾IT佛偈
少林方丈同蘋果公司CEO庫克（Tim Cook）好似大纜都扯唔埋，但少林寺方丈釋永信近期帶團拜訪蘋果公司喺加州嘅總部，唔通去幫iPhone 6開光？
睇呢張釋永信同庫克嘅合照就知佢兩個有幾friend。（少林寺網頁）
追溯番禪宗喺美國嘅歷史，原來六二年日本曹洞宗禪師鈴木俊隆喺三藩市創立咗第一間西方禪修院，蘋果公司創辦人、教主喬布斯，就曾喺呢家禪修院學佛，禪宗就從中影響咗IT界發展，而少林寺就恰恰就被尊為禪宗祖庭。
喬布斯曾喺印度禪修，鈴木俊隆後來仲成為佢師傅，啟發到佢將「禪」崇尚簡約主義融入蘋果公司產品入面。今次方丈就同庫克交流對學佛同科技產品嘅心得，方丈仲大讚用科技產品溝通，減少走動時間，從而減少空氣污染，於是庫克問番方丈轉頭，「少林寺係咪有WIFI？」方丈話遲啲就會覆蓋晒成間少林寺，遲吓仲打算用iTunes嚟授課，睇怕庫克都應該識做，送番一百幾十部iPhone、iPad畀少林寺當做添香油囉！
