城中鏡：廠商會青委微電影賀80歲
為祝賀中華廠商聯合會今年八十周年，廠商會青年委員會委員早前絞盡腦汁幫手度劇本，並以六位數字片酬，請來跨媒體創作人彭秀慧，製作全長僅四分幾鐘微電影，真係秒秒鐘都有血有汗。二十幾位青委又搵來星級舞蹈老師，同佢哋進行魔鬼式訓練，為下月十七日喺廠商會八十周年會慶晚宴粉墨登場，做好準備。
青委主席張永鴻（中）同六位副主席，齊為廠商會八十周年會慶度橋打氣。
耗資六位數字拍攝嘅微電影，講述「廠二代」心聲。（被訪者提供）
廠商會青委秘密練兵，請來星級老師教授舞技。（被訪者提供）
副會長吳永嘉（右）同會董梁啟洲（左）支持本土微電影製作，推動香港創意。
青委主席張永鴻尋日相約六位副主席同廠商會副會長吳永嘉一邊食晏，一邊「腦震盪」，諗吓點樣可以令套微電影同佢哋嘅舞步盡善盡美。套微電影拍咗兩星期，日前大功告成，雖然並無青委親自出鏡，但劇本情節都係圍繞「廠二代」嘅心聲，稍後會喺巴士上播放。
三女將keep fit兼美肌
片中講述一位後生仔，起初嫌做廠佬好老土，抗拒接掌家族生意，反而當上攝影記者。直至佢偶然喺一次訪問中，遇見曾喺自己爸爸間廠打工嘅老夥計，先至明白廠商情濃。上至老闆，下至夥計，都有「獅子山下」嘅拚搏精神，頓時深受感動。青委們睇完套片，個個都話好有共鳴。
張永鴻仲賣關子，話佢哋隻舞嘅難度，遠勝一度熱爆全城嘅騎馬舞。為咗準備登台兼美肌，除咗每星期勤練兩晚舞，三名女副主席秘方盡出，王詩雅每朝食乳酪keep fit、劉子芸就食靈芝粉美肌、顏明秀更話跳咗五堂後，肥肉立即拜拜，認真神奇。
