政壇：搞搞政：AV仁累單雞區選慘敗？
白鴿黨核心兼立法會議員「單雞」單仲偕，點解會喺南區區議會海怡西補選慘敗？其實有根有據，有白鴿黨中人直言，今次補選已為該黨敲起亡黨警鐘！
設計圖片及對白
Erica代表人力首次技術性擊倒白鴿黨，喜極而泣。
陳家珮（中）勝出海怡西補選，尋日與黃楚峰（左）同謝子祺（右）等黨友落區謝票。
新民黨新星陳家珮高票勝出補選，除咗形象好同夠勤力，仲有黨主席葉劉淑儀等黨友力撐，加上該區議席本來屬於時任白鴿黨中委嘅馮煒光，馮煒光中途「走佬」加入政府，選民遷怒於佢前黨友單雞都好正常。最令人震驚嘅係，喺政壇打滾近三十年嘅單雞，得票竟然仲少過同樣「空降」嘅人民力量主席Erica袁彌明，令人質疑係咪連海怡半島呢個中產老社區嘅選民，都變到好似時下啲八、九十後咁激進。
有白鴿黨中人分析，單雞今次慘敗主要有七大死因，除咗上述嘅新民黨光環、馮煒光效應同選民激進化外，仲有公文袋同工黨拒絕幫施、前黨員鄭家富倒戈、單雞唔夠Erica勤力，以及「AV仁」何俊仁醜聞等因素。
其實單雞同Erica得票總和，同一一年馮煒光加另外兩位激進泛民候選人相若，分別係當年公文袋、工黨與白鴿黨站在同一陣線，今次補選兩黨就唔見影，其中公文袋同「民主阿婆」前政務司司長陳方安生，仲揀正喺投票當日大搞政改論壇，擺明無意助選，令唔少該兩黨嘅支持者轉投Erica。至於一直唔妥單雞嘅鄭家富原來係海怡居民，佢喺今次補選疑似「大報復」力撐Erica，亦搶走咗單雞唔少票源。
經過今次「試票」，政界估計Erica會喺一六年立會選舉轉戰港島直選，慘敗嘅單雞則極可能棄選退休，或改為排喺名單第二位幫乳鴿「抬轎」。到時佢個位會否畀人力或公文袋食埋，令該黨絕迹佢哋傳統「票倉」港島區，真係冇人講得準。
