政壇：梁福元髮型葉劉都Like

話說黃卓健周末同身兼元朗區議員嘅梁福元去咗行山，之後喺社交網站上載咗張合照，自言要特登企高啲，先可追平「福元哥＋佢個髮型」咁高。佢又形容梁福元除咗圍村知識多之外，連頭髮亦好多，令唔少男士羨慕，例如早十幾年已經差唔多甩晒頭髮嘅政制及內地事務局局長譚志源，早前出席元朗區議會推銷政改諮詢時，亦公開讚過梁福元個頭夠晒濃密。

葉劉見黃卓健講得咁開心，都忍唔住留言話梁福元個髮型同自己當年嗰個髮型一樣咁有標誌性。記得葉劉當年畀啲反對《公安條例》同廿三條立法嘅人笑佢係「掃把頭」，有同事曾建議佢改變髮型以免招人話柄，但葉劉就豪言：「如果我連自己個髮型都捍衞唔到，又點捍衞香港治安！」成為一時佳話。