政壇：卿姐普通話唔算普通
立法會議員劉慧卿平時較少喺公開場合講普通話，上周六出席基本法研討會向「內地護法」、基本法委員會委員饒戈平提問時就見真章。
劉慧卿（右）主持嘅網台節目訪問羅范椒芬（左），話題當然離唔開討論政改。
在場人士聽得出認真普普通通，但卿姐一有機會就講，自爆有用普通話接受台灣雜誌訪問，之前出席政改早餐會時更係首個用普通話向中聯辦法律部官員發言嘅議員，當場有其他接力發言議員自言「我都無卿姐講得咁好」，似乎卿姐嘅普通話喺芸芸議員中，都算係比上不足，比下有餘。
講番卿姐尋日主持嘅網台節目，出席嘉實係行政會議成員羅范椒芬，佢哋當然離唔開討論政改議題，包括羅太早前話提名委員會要防止對抗中央嘅人「入閘」嘅言論。
羅太再次解畫，話中央唔同意喺最後關頭先用否決權，所以合理推斷就係喺前門把關，即係唔畀心態行為上唔認同國家、影響國家安全嘅人參選。
佢又提及，只要「入閘」嘅候選人都唔係對抗中央，因此即使有人抹黑咗一個候選人，都仲有第二個唔係對抗中央嘅候選人喎！
