政壇：周一鑊曾為校園惡霸
每逢暑假，本港啲大專院校都會爆出有學生組織搞「淫亂O-Camp（迎新營）」，部分更有性騷擾同觸犯《性別歧視條例》之嫌。外號「周一鑊」嘅平等機會委員會主席周一嶽尋日出席一項反性騷擾活動時，就預告今年暑假佢哋會殺入各間大學，教吓班同學仔點樣避免違法。但佢轉個頭又自爆，自己讀大學都成日欺凌啲同學甚至學長，包括喺佢哋溫緊書時大唱「嶽曲」進行精神騷擾，認真狠毒。周一鑊蝦蝦霸霸，其身不正，又邊有資格教人呢？
設計圖片及對白
周一鑊尋日喺活動上指出，平機會舊年一共收到近一千宗同兩性有關嘅投訴，當中三分一係性別歧視個案，主要涉及婦女因懷孕而被僱主炒魷或降職，另外有一成涉及性騷擾，多數都係女性喺職場上受男上司或同事侵犯。佢又主動透露，平機會喺今個夏天巡迴十間大專院校，同班O-Camp搞手分享吓點樣避免性騷擾，費事啲學生玩「有味遊戲」時玩到過晒界，觸犯咗法例都唔知喎！
唱足個半鐘
其後佢講到得意忘形，自爆當年喺入大學頭一個月時，成日畀班師兄欺凌，但係去到第二個月佢就掉番轉頭，不時蝦番班師兄。其中一招係喺啲溫緊書嘅同學面前大展歌喉，仲要專揀埋啲「唱唔完嘅歌」，一唱就唱足個半鐘，等到人哋趕佢走先肯停。早前周一鑊一曲走晒音、甩晒嘴嘅《忘不了你》，短短幾分鐘已經聽到大家嘔晒白泡，佢啲舊同學被迫聽「嶽曲」聽足個半鐘，真係唔死得都算好彩！
佢又提到，有唔少人當粗口係一種社交習慣同語言，但其實唔少粗口都可能涉及性騷擾同歧視，同樣可能違法。問佢有冇講過粗口，佢聲稱自己一向好有禮貌，十一歲以後就唔再講粗口嘞！唔通佢幾歲大嗰時已經粗口爛舌？
