鑊鑊新鮮鑊鑊甘 貪湯醜聞知多少
尋日立春，嚴格講先至係馬年嘅開始。新年伊始咯喎，太一叮本應講啲吉利說話，可惜吖，前廉政專員湯顯明一醜未完一醜來，鑊鑊新鮮鑊鑊甘，搞到新年流流都要畀人再揭爛帳。
話說貪湯一一年九月搞咗場晚宴招待三十九國駐港領事，公務酬酢本來好正常嘅，問題係呢場晚宴開支唔止嚴重超標，而且涉嫌收受利益，早前亦冇向立法會專責委員會交代添。原來貪湯喺呢次晚宴中，公然接受外交部駐港特派員公署派出五名大廚，喺廉署總部主理晚宴，廉署社會關係處仲購入五隻總值近八千元嘅名貴酒杯送畀大廚作贈禮。嗱，廉署係負責反貪防腐嘅紀律部門，無端端接受人哋好處，事後又送贈名貴禮物，博乜先？正如一位前廉署調查主任話齋，貪湯此舉令廉署被質疑「涉嫌收受利益」，根本就係陷廉署於不義，性質非常嚴重o架。
最離譜嘅係，呢場晚宴總開支高達六萬五千元，淨係買酒就用咗近萬元，而支付畀大廚嘅食材費用更超過三萬元，埋單計數，人均開支近一千二百元，超出廉署酬酢上限四百五十元逾一點六倍，問你服未。有出席者爆料，當晚有餐前酒會，茅台、烈酒、雞尾酒一應俱全，之後又有卡拉OK、高球同競酒比賽，勝出者獲贈一支近二千元嘅巨型紅酒，成個廉署總部好似東莞夜場咁，燈紅酒綠，烏煙瘴氣。
一如既往，廉署社關處又係將酒水、食物、禮物、音響等開支，分拆多張單據入帳，企圖掩人耳目。據聞有廉署中人睇唔過眼而提出反對，但社關處一於少理。有立法會議員質疑，社關處必須解釋點解冇上報立法會，同埋點解漠視同僚反對意見。其實仲使乜解釋吖，如果唔係得到貪湯批准甚至可能就係佢嘅主意，社關處點可能自把自為吖。
正所謂，有咁嘅上司，就有咁嘅下屬。早前發表嘅立法會調查報告披露，貪湯任內公務酬酢超過二百餐，逾六十餐費用超標，其中嘅五十餐就係由社關處安排，話佢哋狼狽為奸，一點都冇誇張！
講到底，廉署烏煙瘴氣，聲譽掃地，除咗多得貪湯，仲要多得佢頂頭上司曾蔭權爵士。試諗吓，如果冇貪曾嘅包庇，貪湯敢唔敢隻手遮天吖？又敢唔敢無法無天吖？所以話，「絕代雙貪」摧毀香港廉潔及法治，簡直罪無可恕。係呢，廉署查貪曾已經查咗接近兩年，查貪湯亦有唔少日子，究竟幾時至有結果？家陣內地正全力反腐，據講周永康呢隻大老虎已被關入籠裏，唔通港府連打老鼠都唔夠膽？叮！
