SUN搞作：少膽虫手記：愚蠢的老屈
「女！女！」、「吹！吹！」少膽虫喺公司門口聽到又女又吹，究竟發生咩事？少膽虫一開門，仲以為自己過咗大海，個個都喺新年大賭特賭，「少膽虫，過嚟同我賭番兩手！」少膽虫未見其人，就知係淫賤黎呼喚奴才，「腦細，當然冇問題！」轉身一望，只見淫賤黎蠟晒頭，口入面仲食緊朱古力，邊含邊道︰「我今日唔係腦細，叫我『膠』進！」
淫賤黎自稱做「膠」？少膽虫懶理內容，只管遵從，「係嘅，膠進！」一下九十度反手抽擊，直中少膽虫塊面，「你就膠，我係賭神高~進！唔好講咁多，等我喺賭台上面贏埋你剩低嘅利是！」
「同花順！」、「夫虜贏你蛇！」淫賤黎勢估唔到自己輸到褲都甩，「冇可能，等我仲屈對面海會裝多啲天眼，逼啲老千嚟香港教我一招半式，我仲喺《爛果》裝天眼，防埋人哋出千……少膽虫，唔通你戴咗隱形液晶體顯影眼鏡？」
少膽虫搖搖頭，「我唔識咩液晶、晶液眼鏡，我淨係知大大塊鏡喺你後面，想屈我錢都醒啲喇，膠進！」
