城中鏡：劉詩昆機場大掃靚玩具
年初四喺機場遇到鋼琴大師劉詩昆同「鋼琴公主」孫穎結伴同遊，原來佢哋一早就約咗班朋友去日本沖繩玩，可能未到登機時間，佢哋喺機場各自購物，劉詩昆入咗間玩具店，而孫穎就去咗書店買書。
劉詩昆（左）彈琴同揀玩具一樣咁專注。
劉詩昆喺玩具店內左揀右揀，逐樣仔細研究，睇咗成十五至二十分鐘，最後見佢買咗一袋玩具走。佢個孫都已經十八歲，仲喺紐約讀緊設計，點解佢會喺度買玩具呢？其實佢除咗開辦琴行之外，仲有喺上海浦東開辦幼兒園，為咗物色啲靚玩具擺喺幼兒園，於是養成平日四周圍挑選玩具嘅習慣，最誇張嗰次仲喺深圳買咗成架貨車嘅玩具返上海添！
據理解，劉詩昆上海間幼兒園專走貴族式校園路線，無論校舍同球場都有中學嘅規模，有部分導師仲係由上海教育局推薦，無論音樂底子、教育經驗同熱誠都相當豐富。孫穎坦言，有諗過喺香港開番間幼兒園，但香港地方太細，好難搵到一個合適地方可以凸顯到佢哋間幼兒園嘅品牌氣派喎！
