城中鏡：新地兄弟打孖傳大愛

新鴻基地產每逢過時過節都搞唔少愛心慈善活動，舊年新年請「老友記」去馬灣公園挪亞方舟食盆菜，今年新年仲打孖上，正式啟動「愛．融和」傷健同遊計劃，陸續招待弱勢社群免費參觀本港兩大熱門景點挪亞方舟，同埋天際100香港觀景台，兼提供平台畀已培訓嘅青少年導賞團互動交流。

郭炳聯（箭嘴示）特別向參觀者送贈載有蘿蔔糕同笑口棗嘅福袋，祝願大家馬年步步高陞、笑口常開。

郭炳江（箭嘴示）話「愛．融和」傷健同遊計劃推動和諧共融。

新地主席兼董事總經理郭炳聯早幾日帶咗一眾聽障小朋友、輪椅使用人士，參觀全港最高建築物環球貿易廣場（ICC）100樓嘅天際100香港觀景台，仲親手向每位參加者，送贈大大個福袋，原來入面有蘿蔔糕同笑口棗，希望大家馬年步步高陞、笑口常開咁話喎。

由於絕大部分參觀者都係第一次遊覽天際100，所以倍感興奮之餘，都再三向郭炳聯致謝，郭炳聯亦主動向大家問好，更與場內小朋友同遊，名副其實行咗轉新年大運。

至於新地另一主席兼董事總經理郭炳江就去咗挪亞方舟，參加傷健同遊活動，佢話活動目的係共融，同挪亞方舟宣揚關愛及和諧嘅宗旨不謀而合。