新界鄉議局主席「發叔」劉皇發近日放風話考慮組黨，仲會打正旗號以鄉議局名義出戰區議會甚至立法會添！若然真係派人出戰沙田區議會，即將要硬撼「沙田執政黨」公民力量（公記）同建仔。眾所周知，包括主席何厚祥在內等眾多公記成員，近日同由身兼行政、立法兩會議員葉劉淑儀所領導嘅新民黨「結婚」，唔少公記嘅區議會都入咗黨，咁身兼公記嘅沙田鄉事委員會成員手上嘅選票，又應該何去何從呢？

設計圖片及對白

尋日喺一個新春午宴遇到沙田鄉事委員會主席莫錦貴，即刻捉住佢問個究竟？佢透露，雖然沙田鄉紳各有所屬政黨發展，而佢本身都係經民聯嘅成員，但若然鄉議局真係派人出戰新界東，相信佢哋最終都會自願「歸邊」向發叔獻票。

老實講，新民黨同公記「結婚」，都係想擴大政治版圖，為未來區議會同立法會選舉鋪路啫，咁若果鄉議局真係派人出選區議會同立法會選舉，咁葉劉夾喺公記同發叔中間，爭起票上嚟咪盞得個嬲字。

第一手消息請下載on.cc東網iPhone/iPad/Android/Windows Phone Apps