政壇：胡志偉助理疑賣過期米

我哋尋日就收到讀者投訴，話白鴿黨九龍東立法會議員胡志偉嘅牛頭角區總幹事黃正峰，上月以「牛頭角居民發展協會」名義，幫會員訂購八公斤平價泰國香米，而呢位讀者就用咗一百五十元訂咗兩包米。

點知上月中收貨時，讀者發現米袋容量字樣被人用筆由「15」公斤改做「8」公斤，連保質期字樣「2013年」都改為「2018年」（藍框示，讀者提供），質疑佢哋係咪賣過期米同咁改標籤係咪違法。

胡志偉話係誤會，皆因供應商唔夠八公斤米袋，所以用十五公斤袋，磅過肯定足秤。而供應商畀嘅係新米，而米袋就係舊嘅，上面標籤係供應商更改。至於點解唔退貨，佢就話來貨當日就係街坊取米嘅日子，當日有印單張向街坊解釋。但佢都認衰，話職員經驗不足，冇即時要求供應商換貨，向街坊道歉。