過萬冊圖書被棄於街邊,淪為「免費書攤」,如果魯迅筆下嘅孔乙己翻生,就唔使因為「竊書」而畀人打跛腳咯。

話說香港仔鴨脷洲前排出現一座「書山」,三百幾箱貼有香港中央圖書館封條嘅紙皮箱堆喺街邊,部分已經拆開,新舊圖書散落一地。追查之下,發現原來係中央圖書館已注銷嘅書籍,估計至少過萬本,康文署話已安排承辦商回收喎。

呢批圖書嘅內容可以講係五花八門,包羅萬有,旅遊、財經、文學、科學、藝術、心理等等,有啲甩皮甩骨,已經借閱多次,有啲外表同新書無異,幾乎連睇都未睇過,咁就話要注銷,你話嘥唔嘥啲吖。

唔講唔知,過去三個財政年度,圖書館每季注銷嘅書籍達十六萬四千本,證明今次唔係偶然,之但係一次過注銷咁多書,包括唔少幾乎全新嘅書籍,始終令人諗唔通。正如有立法會議員話齋,康文署非常浪費、非常唔環保、非常唔合邏輯,質疑亂咁揀書,買入大批無人吼嘅圖書,搞到要當廢紙丟棄,要求署方詳細交代。

其實計太一叮話齋,浪費公帑事小,破壞環保事大,年年注銷幾十萬本書,等於斬咗幾多棵樹,康文署班官僚有冇計算過?又覺唔覺得可恥吖?

話時話,呢啲書好多仲用得,就算圖書館唔啱使,都可以送畀社福機構同有需要人士啫,社區中心又得,孤兒院又得,點解要咁浪費呢?當然喇,康文署一向洗腳唔抹腳,最慳水慳力就係將唔要嘅圖書當廢紙賣。

其實,康文署管理不善,浪費公帑,一向備受詬病,呢啲只係冰山一角。○二年審計署批評該署堅持每年買七十萬項圖書館資料嘅所謂採購原則不切實際,令部分圖書館因為地方唔夠,焗住將藏書入庫,得物無所用。

弊在康文署批評接受,懶惰照舊,○七年再次被審計署踢爆多年來從未點算同仔細檢查七十六間圖書館嘅館藏,部分書籍已遺失或損壞都未被發現。嗱,話口未完,今次又有大批新書要當廢紙賣,你話康文署係咪死性不改,專倒納稅人米吖!

浪費公帑簡直已經成為康文署嘅習慣,好似電子書咁,政府多年來投入大量資源,全港公共圖書館嘅電子書總藏量已經有十四萬項咁多,但由於康文署宣傳不足,大多數市民根本唔知圖書館有電子書可借,結果變咗館藏愈多,浪費愈大。

計太一叮話齋,好書變廢紙,完全係因為康文署有班無能失職嘅廢柴庸官,叮!

第一手消息請下載on.cc東網iPhone/iPad/Android/Windows Phone Apps