潮語「車震」嘅意思就係喺車上進行性行為咁嘅意思，係「打野戰」嘅一種。所指嘅車當然係私家車，而「震」就係指係車上面歡好時，令到車輛震吓震吓咁，所以就有「車震」呢個潮語嘅產生。

早排有條片喺網絡瘋傳，短片嘅內容係一對男女喺港島西灣河嘉亨灣附近涉嫌「打野戰」，即係當街當巷翻雲覆雨，旁若無人地進行室外性行為。途人當然為之側目兼拍下佢哋嘅溫馨場面然後放上網。根據片中睇到嗰對男女，都唔似係十八廿二，打扮又唔似窮到連開房嘅錢都無，但係就唔知點解急色到要喺街頭解決，當中是否牽涉表演成分，呢啲就只有當事人至知。不過有啲人係有呢鋪癮，覺得街邊搞嘢刺激啲，有一種被偷窺嘅快感。又有啲男女覺得激情加慾火燒埋身，係要就地正法先至夠過癮！所以就算唔「打野戰」，有啲有車一族慾火焚身時，都會試吓玩「車震」。

香港人口密度全球數一數二，有時年輕男女想搵個地方親熱一吓都唔易。癡情男女就算想正正經經搵間時租酒店短聚一番，今時今日好多時租酒店都被自由行旅客所佔據，有啲迫不得已惟有驅車去到荒山野嶺「車震」。雖則男女歡好係兩個人之間嘅事，私家車又係私人財產，但係「車震」喺香港係犯法，如被發現，有機會告你公眾地方行為不檢，仲有機會見報。香港要搵地方「車震」，又要四野無人又要有氣氛都好難。傳統「車震」熱點有飛鵝山、龍翔道觀景台同獅子亭等等，有啲地方仲有告示牌叫人唔好「車震」，以免影響先人休息，真係用心良苦。

「車震」呢家嘢又唔係局限於男女，男男同女女都可以嘅。特區政府話要令香港人住好啲，長遠嚟講，年輕人擁有自己嘅生活空間，咪唔使「車震」啦，不過唔知何年何月何日先可以理想達到呢?

第一手消息請下載on.cc東網iPhone/iPad/Android/Windows Phone Apps