政壇：搞搞政：阿毛Gary自打嘴巴
政治人物成日被人批評講一套、做一套，「香港本土」兩位成員毛孟靜（阿毛）同范國威（Gary），成日想同內地劃清界線，尋日佢哋同傳媒茶敍，席間都要高舉「單程證審批權YES！」同「香港大陸化NO！」兩張揮春，弊在揮春嘅「單」字竟然疑似變成簡體字「单」，Gary撐揮春係用草書寫，唔係簡體字喎；呢頭撐完，嗰頭阿毛又自爆今年印成二千個利是封，咁都算環保咩？
設計圖片及對白
佢哋兩個尋日整定揮春諗住預先同市民拜個早年，點知鬧出簡體字風波，Gary話，揮春係由一個擅長寫書法嘅朋友代勞，其中嘅「单」字唔係簡體字喎。講到過年嘅準備，「香港本土」製作咗一批利是封諗住周街派，阿毛話自己係綠領行動成員之一，所以都有響應唔好印咁多利是封嘅號召，淨係印咗二千個咁大把，其實真係撐環保嘅，應該連呢啲宣傳都慳番呀嘛。
另外，泛民主派飯盒會二十一個議員尋日就終審法院裁定新移民綜援居港年期七年做法違憲一事，發表判決立場書，強調尊重及認同法庭判決，又希望判決唔會加深社會對新移民嘅歧視。對於立場書唔包括阿毛同Gary二人，阿毛話自己尊重法庭裁決，但就唔認同裁決，所以唔會簽名喎。
