農曆新年將至,傳統上過咗年都有較多打工仔轉工,嗰啲喺求職榜上排名高嘅公司勢必大把人爭。《財富》雜誌一年一度嘅「美國100家最適宜工作公司」選舉啱啱公布,今年位列榜首嘅公司又係Google,呢間公司已經連續三年冠,皆因工作及福利都受稱讚,Google喺過去十二個月一共收到約一百二十萬份求職申請,即係話平均每月都有超過十萬人申請Google嘅職位。

Google有咩過人之處呢?八卦一下原來真係令人羨慕,除咗工作、福利之外,Google喺二○一三年股價升到一千美元以上,由於個個Google員工都有公司股票,呢啲員工股東又多一份開心喇。

不過,好多美國嘅IT公司都改善條件吸納人才,譬如選舉中嘅亞軍SAS軟件公司,總部有醫療中心,員工同屋企人要睇醫生就方便得多喇!設計軟件公司歐特克每四年獎勵員工六個禮拜全薪休假,舊年已經有四百二十九名員工受惠。另一間軟件公司Intuit每年提供高達六百五十美元健身獎勵,包括游泳課程、健身俱樂部會員卡等。

第一手消息請下載on.cc東網iPhone/iPad/Android/Windows Phone Apps