政壇：黃英豪料今年金價企穩
黃金價格經過一輪調整後，好多人都對新一年金市各有睇法，日前香港五邑青年總會舉行成立儀式暨首屆會董會就職典禮，名人鄉里紛出席，包括會長黃達東、利希慎後人利承武、香港資源主席黃英豪（Kennedy）及囝囝黃宇德等人。五邑係指廣東江門市轄下新會、台山、開平、恩平及鶴山，當地一向係中國最大僑鄉，本港就有超過一百二十五萬人，難怪當日咁墟冚。
黃英豪（左）同囝囝黃宇德（右）父子兵齊捧場。
最近Kennedy將香港資源一半股權賣畀六福集團，套現三億元，雖然令佢「新金王」名號不再，但就為公司引入咗財力雄厚嘅大股東，Kennedy農曆新年會同家人去新西蘭玩，初三就會返港，約咗朋友當日去車公廟行大運喎。講起近期跌至四年低位嘅金市，Kennedy話，金價跌咗帶動旗下門市平均銷售額升咗幾成，近日已經開始有新年氣氛。佢預計今年黃金價格會企穩，徘徊喺每安士約一千二百美元價位，仲話依家好抵買添！
青年事務委員會主席陳振彬同Kennedy一樣係五邑人，當日亦有到場，首任會長黃達東見到咁多人支持，開心到不得了。佢話總會籌備咗個幾月就已經有幾百名會員，成績非常理想，未來期望會員人數可以達到三千人，以便匯聚五邑新世代力量。
