李秀恒
香港中華廠商聯合會（廠商會）年底就換屆，佢哋同其他傳統商會有少少分別，通常唔會出現等額選舉，換言之內鬥好難免。據悉，兩大熱門會長人選分別係做玩具起家嘅副會長顏吳餘英同第二副會長李秀恒，不過，都要確定第一副會長陳淑玲真係唔想接棒至得。消息話，陳淑玲願意繼續為廠商會効力，但就無意出選會長一職，呢個決定連佢堂兄、全國政協常委陳永棋（棋哥）都支持喎。陳永棋喺廠商會係叔父輩級數，佢呢句說話一出，大家都認定陳淑玲唔會選。
顏吳餘英
會長一職由廠商會內一百名會董推舉出來，多位會董都睇好顏太或李秀恒擔任，話兩人各有擅長之處，前者以人緣佳見稱，後者就以勤力取勝，估計最後陳淑玲唔出手，都離唔開兩人做會長。但係，另有傳聞話喺一個私人派對上，有人飲大兩杯，就指住另一位副會長吳永嘉猛叫「會長飲杯」，所以吳永嘉亦有可能爆出個大冷門。
另一方面，廠商會立法會代表就好似冇乜人爭住做，廠商會一眾領導層都認為，現任立法會廠商會代表林大輝表現交到功課，如果佢願意留在功能界別，大輝絕對可以連任，但如果大輝堅持走直選路線，廠商會到時先會搵第二個頂上。
至於邊個可以代替大輝呢？有人認為現任會長施榮懷或者有機會。
第一手消息請下載on.cc東網
