前全國人大常委曾憲梓三公子、金利來集團行政總裁曾智明同女歌手「小恩子」黎瑞恩近日盛傳婚變，吸引大批傳媒連日喺小恩子同老爺曾憲梓同住嘅九龍塘大宅門外守候。咁啱得咁蹺，不知就裏嘅鄉議局主席劉皇發尋日下午無端端登門造訪，仲聲稱搵「曾太」添！究竟發叔要搵曾憲梓太太，抑或曾智明太太呢？大家好奇之下，梗係唔放過發叔啦。

劉皇發（右）尋日代太座登門向曾憲梓太太派糕，劉太（左）全程睇實。

不過，發叔眼見大宅外咁多記者、仲向佢施以連環閃光燈突襲，只好急急腳登上七人車同太太劉吳妹姝速逃，究竟發叔登門係為咩呢？劉太事後向我哋透露，佢同曾憲梓太太向來好老友，每年都會自家炮製馬蹄糕送畀包括曾太等好友，發叔尋日只係代佢落車登門派糕，絕無其他，對曾憲梓公子嘅婚變傳聞亦唔知情，叫大家唔好亂諗咁話。

第一手消息請下載on.cc東網iPhone/iPad/Android/Windows Phone Apps