政壇：巨貪案「候判」之身 大劉揞肚蒲頭
牽涉華人置業主席劉鑾雄（大劉）、南華足球隊足主兼商人羅傑承等人嘅澳門巨貪案，所有被告嘅代表律師前日已完成結案陳詞，等候三月十四日再次開庭宣判。過去有好多例子，每逢被告喺等候法庭裁決前都坐唔安、食唔落，好似等候行刑咁，但一直以病為由而冇出庭應訊嘅大劉就啱啱相反，前兩日案件進行結案陳詞時，罕有地冇喺佢去開嘅灣仔富豪飯堂食晏，到尋日變成「候判」之身，佢又健步如飛咁現身富豪飯堂，食番餐飽飯。
大劉（右）用左手按住個肚去灣仔富豪飯堂食晏，被問及官司一事即面有難色。
聞官司面有難色
尋日下午約一點鐘，大劉獨自坐座駕抵達富豪飯堂，見佢戴住眼鏡，目無表情，一落車就用左手按住個肚，一直按住步入飯堂乘搭升降機，唔知佢係肚餓定係肚痛呢？問佢對澳門官司有冇回應，點解唔出庭時，佢就不發一言，面有難色。直到兩點鐘左右，大劉同秘書步出門口，仲向飯堂職員揮手，然後登上座駕離去。
