政壇：鄉紳要同林鄭又傾又砌
政改小組成日將「有商有量」掛喺嘴邊，小組主席兼政務司司長林鄭月娥尋日深入鄉議局陣營，就政改諮詢同鄉議局一班鄉紳會面，諗住坐低慢慢傾喇，點知佢嘅四字真言就成為被反攻嘅武器。同林鄭素有積怨嘅鄉議局主席劉皇發（發叔）絕對唔係省油嘅燈，即使喺政改呢啲大是大非議題上同政府企同一陣線，但發叔話齋「要人付出，都要畀啲好處人哋啦！」所以要求林鄭對新界政策都要「有商有量」，潛台詞即係政府過去所為太霸道囉，觀乎發叔同鄉紳嘅言論，似乎想同政府「又傾又砌」多啲喎！
設計圖片及對白
要數鄉議局同林鄭嘅牙齒印，遠有林鄭時任發展局局長期間嚴打新界村屋僭建，近有擴建堆填區方案同將西灣村納入郊野公園範圍嘅爭議，每次雙方交戰勢必磨拳擦掌、拳拳到肉，所以發叔尋日同鄉紳見完林鄭後，除咗要求下屆立法會選舉保留功能組別，亦要求下屆特首選舉嘅提名委員會若要擴大人數，鄉議局代表數目亦要按比例增加。
呢啲要求對政府或者只係小意思，但真正嘅戰場似乎喺政改議題之外。發叔會後就擴建屯門堆填區爭議私底下向我哋表明，政府既然要屯門街坊承受港人唔願意接受嘅設施，屯門堆填區面積至少要由原擬嘅二百四十公頃，至少減五十公頃先有得傾，又謂政府虧欠屯門人咁多，係時候要還喇！
另一邊廂，鄉議局執委梁和平亦趁出席公開場合向政府下戰書，批評政府將原居民土地納入郊野公園範圍做法粗暴，原居民正部署同政府「拗手瓜」，揚言要政府喺新界東北同大嶼山發展上「寸步難行」咁話！政府今鋪會唔會肉隨砧板上，任由發叔宰割呢？真係拭目以待。
拜訪泛民 政改嚴重分歧
林鄭傍晚又去咗立法會同十多名民主黨高層會面，係佢首次就政改拜訪泛民黨派。林鄭喺會前賣晒口乖，話該黨係泛民主派嘅中流砥柱，但會後佢承認雙方存在嚴重分歧，黨主席劉慧卿更聲言如果政府夾硬嚟，該黨唔使佔中三子吹雞都會即時佔中。林鄭一日之內兩次碰到一臉灰，認真失禮街坊。
