食水變成漂白水 官僚至今欠交代
「一比九十九，清潔好幫手」，當年沙士襲港期間，漂白水加清水嘅比例配方成為殺菌消毒好幫手。大家有冇諗過，如果人類飲咗一比九十九嘅漂白水溝食水，會有乜嘢後果呢？咪以為冇可能吖，香港真係發生咗咁恐怖嘅事件。
近日元朗及屯門一帶居民不約而同發現家居自來水發出濃烈刺鼻嘅漂白水味，每日好似用漂白水沖涼，用漂白水漱口，用漂白水煮食，搞到人心惶惶。更得人驚嘅係水務署麻木不仁，明明收到大量投訴，居然闊佬懶理，關人個關，肇事原因遲遲冇交代，食水水質亦遲遲冇改善。
好嘞，事件經東方報業集團踢爆後，結果又點呢？結果就係水質明顯改善囉。呢，本報記者自行委聘獨立化驗公司到元朗區抽取食水樣本檢測，初步顯示所有樣本嘅殘餘氯含量介乎每公升零點五毫克至零點八一毫克，屬於正常水平。而居民亦異口同聲咁話，自從東方報業連日報道之後，食水刺鼻難聞嘅氣味大減，質疑事件曝光令水務署知驚，急急補鑊改善水質。
所以話，港產官僚真係成碌四方木咁，唔踢唔郁。大家試諗吓，如果唔係東方報業踢爆，當局會唔會做嘢吖？如果唔係傳媒跟進報道，水務署又識唔識補鑊吖？港產官僚嘅最大特色就係反應遲鈍，後知後覺，而且明知出錯都唔肯主動補鑊。如果唔係正義傳媒為民發聲，令事件曝光，莫講話食水變漂白水，就算食水含有砒霜，港產官僚都可能關人個關咋！
事實再次證明，香港最寶貴嘅核心價值始終係新聞自由。港產官僚渾渾噩噩，做嘢甩甩漏漏，全靠正義傳媒發揮第四權監察功能，為民喉舌，揭露問題，督促政府改善施政，市民先至有申訴渠道，香港先至有希望咋。尤其係今時今日，官員無能，政客無良，如果新聞自由失守，正義傳媒噤聲，香港隨時暗無天日都似。好簡單，如果唔係傳媒鍥而不捨，窮追猛打，「絕代雙貪」前特首曾蔭權爵士同前廉政專員湯顯明嘅貪腐醜聞可能永無水落石出一日。
一句講晒，食水變成漂白水，監察惟靠第四權。食水安全涉及市民健康，水務署唔好再闊佬懶理，唔嗲唔吊嘞，雖然最新檢測證明氯含量冇超標，但之前點解會好似漂白水，當局仍然欠居民一個交代。咪話太一叮唔提醒，水務署服務水皮，一向被稱為「水皮署」，如果漂白食水問題唔根治，你哋唔止係水皮署，仲隨時多個花名，畀人叫「毒水署」吖，叮！
