香港賽馬會行政總裁應家柏尋日向傳媒預告農曆年初三賽馬日資訊，除咗公布彩金，預祝一班市民「財源廣進」外，仲同喺內地紅到爆嘅跨界藝術家馬興文即席揮毫，將中國水墨畫同西方油畫嚟個Crossover！應家柏一聽到話要畫水墨畫，即時顯得好猶豫，仲大大聲話自己八歲開始就無拎過畫筆添！

應家柏話八歲開始無拎過畫筆，點知又畫得唔錯喎！

「無國界傑作」完成啦！

應家柏喺半推半就下都要硬着頭皮拾起畫筆，小心翼翼地喺宣紙上畫咗個圓形，喺馬興文指導下，慢慢畫咗隻「象形」馬出嚟，見自己畫得幾好，即刻信心大增，轉用油畫畫筆繼續畫，來自德國嘅佢仲用母語德文簽咗個大名添！最後佢愈畫愈興奮，忍唔住請埋來自美國嘅馬會賽馬事務執行總監利達賢、中國人民大學徐悲鴻藝術研究院院長徐慶平出來，請大家喺幅「大作」上面再添番啲墨水，完成一幅有好多個馬字嘅「無國界」作品。佢仲打趣話諗住遲啲拎幅「傑作」出去做慈善義賣，睇吓籌到幾多錢喎！

第一手消息請下載on.cc東網iPhone/iPad/Android/Windows Phone Apps