SUN搞作：網絡小說：智漲遇着蠅
胃缸做完入主心戰室後第一場Show，自詡白宮發言人嘅佢去食飯慶祝。一入到餐廳，胃缸望見旁邊坐咗位潦倒阿叔，見高拜見低踩嘅佢，即刻發揮「正苦」幫窮人嘅精神。
胃缸隨便叫咗客牛扒，然後上下打量阿叔，好大聲講：「我睇你都未去過白宮……哎呀，有無搭過飛機睇吓夜景？應該係未搭過飛機啦，我奶媽搞緊團，好有心幫你。」
胃缸見阿叔無反應，繼續講：「我話晒都係專員，唔會呃你嘅！」
阿叔仍然好靜，低頭食飯。
胃缸一邊切牛扒，一邊話：「我諗你都未食過扒啦，我每日同腦細去食，食到厭！」
阿叔呢個時候起身走人。
胃缸見阿叔想走，即刻懶關心咁問：「使唔使打包份牛扒呀？我拍心口，三字千金─唔收你錢！」
阿叔呢刻抬起頭，胃缸望到佢個樣，嚇到張開口，原來阿叔個樣好似生痔瘡咁！阿叔嘲諷咁話：「嘻嘻，學擦鞋上位？你未夠班呀！我日日嚟呢度又飲又食，未試過好似你咁，要畀錢咁Cheap！」
說此話的人，正是貪曾。
