政壇：搞搞政：漏報幾十蚊選舉開支 七君子唔見十幾萬
二○一二年特首選舉前夕，負責選出特首嘅一千二百名選委會選委須改選，當年未加入政府做食物及衞生局局長嘅骨科醫生高永文，連同另外兩名骨科醫生方津生同潘德鄰、泌尿科專科醫生葉維晉等人組成「七君子」團隊，競逐醫學界選委三十個名額，七君子中有六人勝出。殊不知最近有關部門發現並通知七君子，佢哋前年選舉開支單據報漏數，佢哋經商議後決定入稟高等法院申請選舉開支寬免。
設計圖片及對白
葉維晉接受查詢時話，每人選舉開支只係報漏咗幾蚊，之不過要修正番就要搵律師幫手，十幾萬元嘅律師費，粗略估計每人攤分至少二萬多元。換言之，呢次真係因小失大囉！
食衞局發言人都證實，高永文等人已向法庭申請寬免，希望獲准更正選舉開支申報書上兩大類錯誤，包括無心之失而造成嘅錯誤計算，以及申報某些開支時無一併遞交嘅發票同收據。發言人強調，即使有以上誤算或遺漏，七人選舉總開支仍在限額內，換言之未有超支。
喺市民眼中，為咗報漏幾十蚊又要搵律師，又要重新宣誓「補鑊」好似好勞民傷財，但法律面前人人平等，漏報一蚊都係漏報，加上高永文做咗問責官員，凡事從嚴處理，呢個對於七君子特別係高永文嚟講，會係政治上較少機會被人再「抽秤」嘅做法喇！
