政壇：卿姐鬧衰貪曾《明報》
施政報告建議每年投放二百億元經常性開支扶貧，向來同政府唔多啱傾嘅立法會議員劉慧卿尋日同傳媒茶敍時，就罕有將槍頭移離現屆政府，狠批「貪曾」前特首曾蔭權爵士治港多年一直唔做嘢，直言「要鬧衰佢」咁話！卿姐坦言，唔會因為扶貧措施係由CY提出就反對，但擔心去年施政報告曾提出資助尖子負笈名校，但建議最終胎死腹中嘅歷史會再重演，希望建議可以全部落實。
劉慧卿
對於近來「局勢動盪」嘅《明報》，曾任記者多年嘅劉慧卿除咗主動提起《明報》管理層大執位風波之外，仲形容《明報》好似內地一間曾有工人跳樓嘅刻薄電子廠咁，請人「出手低」。卿姐引述有指《明報》高層曾經以「淨係『明報』兩個字已經值三千元」，向應徵者壓價，卿姐仲重提《明報》總編輯欣賞有畢業生讀書時已儲定一筆錢，只為入《明報》打份記者工，批評薪金過低。咁講法，貪曾守財成奴、《明報》出手過低，大家一樣咁孤寒，一毛不拔。
