政壇：行會成員「瞓身」撐CY

特首CY梁振英尋日朝早到立法會就施政報告接受議員質詢。行會召集人WK林煥光身為智囊，亦一連兩日拉埋周松崗同鄭耀棠兩位行會成員坐喺觀眾席打氣，但WK落場兩日就瞓足兩日，唔通佢想透過「瞓身」支持CY？

鄭耀棠（後排左）同林煥光（後排右）齊齊「釣魚」。

未知係咪行會公務繁忙抑或太早開工，WK全程「釣魚」瞌眼瞓，不但冇視CY發言，就連先後有泛民主派議員高叫口號被逐離場，佢都唔係次次知醒；周松崗起初先係瞓咗一轉，醒咗又不時玩電話，最後坐咗一個鐘都頂唔順走先，鄭耀棠跟尾走，二人之後冇再返過嚟，留低WK坐足全程。