政壇：吳得掂縮骨推波畀曾德成
今年施政報告主題其中一句係「讓年青的 各展所長」，「年青」兩個字近日引起廣泛討論，有人質疑係咪應該改為「年輕」先啱。教育局局長「吳得掂」吳克儉同民政事務局局長曾德成尋日同場講解施政報告時，有記者就把握機會問吳得掂對於呢個爭議嘅睇法，點知吳得掂竟然縮骨到將個波交畀曾德成，話德成兄嘅文化水平高啲，交由佢答喎！
曾德成（左）同吳克儉講解施政報告。
曾德成被吳得掂「突襲」，惟有硬着頭皮回答記者，點知佢爆料話原來事前已同特首討論過呢個問題，話應該用「年輕」一詞，但係特首認為大家都接受「年青」呢個字眼，約定俗成無問題咁話。曾德成仲話呢個「爭論」不止發生過一次，之前都有同同事講過應該用「年輕」，但最終同事冇聽佢意見。坐喺隔籬嘅吳得掂就全程笑笑口「食花生」，唔知換轉係佢又會點回答呢？
上任後多次外訪嘅吳得掂尋日喺記者會上又分享佢嘅外訪得着，點知佢又口快快將外訪講錯做「旅行」，睇嚟局長真係好享受外訪工作，寓「外訪」於「旅行」喎！
