政壇：公文袋黨友內訌 畀CY窒番轉頭
特首CY梁振英尋日出席立法會答問大會，解答議員對施政報告嘅疑問，為時個半鐘嘅答問大會共有十六位議員提問，當中六位係泛民主派議員。不過，由於大部分泛民重炮手已喺上次答問大會問過問題，今次無機會再問，所以尋日泛民嘅問題不但唔可以擊中要害，部分泛民仲反被CY寸番轉頭，自取其辱。其中公文袋「阿毛」毛孟靜仲喺會後上網嘲諷陳家洛嘅提問令佢打晒冷震，都唔知係咪黨友。
設計圖片及對白
阿毛同陳家洛嘅質詢根本偏離施政報告嘅內容。阿毛先係批評CY鼓勵香港年輕人北上升學，質疑想搞「殖民洗牌」，之後又無厘頭問CY幾時會收番單程證審批權。CY揶揄阿毛「有與別不同嘅意見」，話持單程證來港人士主要都係為咗家庭團聚，如果佢將單程證審批權交畀阿毛，相信佢都唔會否定呢項大原則，擺明係想寸阿毛唔識嘢。
問係咪想學壽西斯古
之後發問嘅陳家洛先係批評行政會議成員張志剛將中央同泛民嘅關係，比擬做中日關係係不倫不類，之後又化身成國際關係學者，質問CY如果想喺歷史留名，「係想學（羅馬尼亞前獨裁領袖）壽西斯古被人民唾棄推翻，定係好似（前蘇聯領袖）戈爾巴喬夫順應民意，推動真普選呢？」CY反駁佢嘅比喻先至係「不倫不類」，話香港情況同羅馬尼亞及前蘇聯等地完全唔同，唔可以咁樣攞嚟比。
阿毛同陳家洛畀CY窒番轉頭已經爆，點知仲有後續，就係阿毛之後喺社交網站上嘲諷陳家洛嘅提問令佢打晒冷震。究竟佢哋係咪自己友？
