上樓三年夢成空告官更應告貪曾

其實，港府房策百孔千瘡，市民承受嘅係一條龍式痛苦，要貪曾體會無殼蝸牛嘅難處，唔一定住劏房嘅，如果再有創意啲，抗議標語大可改為：「誠邀貪曾輪候公屋！」

冇錯，公屋長期供不應求，無殼蝸牛可望而不可即，嗰份愈來愈漫長嘅等待已經變成一種港式精神折磨，直頭痛到可以興訟索償o架。嗱，全港基層住屋大聯盟尋日發起馬拉松式打官司索償行動，每日派出一名公屋申請人入禀小額錢債審裁處，控告房屋署未能兌現三年上樓承諾，要求賠償租金差額及精神損傷，預料最少有八十多戶參與，希望透過呢種方法迫使港府正視公屋短缺及錯配問題。

唉，電影裏面權貴欺負村民，所以有《秋菊打官司》，諗唔到現實世界因為官僚懶理民瘼，亦上演一幕基層打官司，而且仲係日日放映，全港收看，港產官僚醜唔醜？大聯盟係咁講嘅，去年審計署報告踢爆，現時有逾一萬二千個空置公屋單位，當中有四千個可供出租，申請人依然不獲編配公屋就係房署失職，有信心可以追討賠償。

即係咁，無殼蝸牛控告房屋官僚，誰勝誰負要上庭至知，不過公屋政策存在問題，就唔使審都一清二楚。先唔講供應不足呢個陳年死結，單係官僚僵化敷衍塞責，已經激到人生蝦咁跳。一方面有萬幾個公屋單位空置養蚊，一方面申請輪候嘅人龍排到落上水，點解唔動吓腦筋，畀有需要者入住呢？冇錯，空置公屋可能存在呢樣嗰樣缺點，可能面積細小，又可能地區偏遠，但冤豬頭都有盲鼻菩薩喇，何況係爭崩頭嘅公營房屋？房署官僚得過且過，不負責任，無殼蝸牛上樓點會唔慢過龜爬吖！

公屋失衡係港府房策失敗嘅縮影。尤其係前朝政府，一味胡混度日，既貪又腐，無殼蝸牛嘅痛苦佢哋話之你，呢，今屆政府最近大規模更改土地用途，揭露貪曾好大喜功，居然為咗發展所謂嘅六大產業，扣起多幅土地白白曬太陽。冤有頭債有主，公屋申請人反正入禀，不如告埋貪曾，控訴佢無能失職，禍港殃民，實得到市民支持o架！

係人都要有瓦遮頭，如果草根階層連搵個安身之所都難，社會點會穩定呢。新一份施政報告聽日出爐，最新民調結果顯示，最多受訪者希望處理房屋問題，為政者聽到未吖，叮！