今天的香港特區廢柴政府，已去到無法再管治香港的地步了！

勿說政府最高層無誠信、無民意基礎支持，更是獨到無朋友，只豢養咗一群比垃圾還無用的庸才，幫唔到社會解決民生問題外，仲每每有低B行徑，激起民憤；加上，高層們的明爭暗鬥、狗咬狗骨，互組「內閣」，大搞小圈子，盲嘅都睇到呢十七個月嚟，香港絕唔係得「一個營」，而且，還未計西環那邊「分組」的大大小小多個自詡代表阿爺聲音的團伙呀！

香港無王管到乜嘢惡劣地步呢？唔講最敏感的政治嘞！因已成死症，各賤精粉皮喺度肆意抽水，利用香港作戰場，不理社會福祉，不管市民生死矣！

今天，要講的，就係連無良的士佬，也唔放香港法治在眼內，話之你香港政府班廢柴噏乜，佢哋仍明目張膽的違法，派卡片收八折，唔單只係「老奉」的「正當生意手法」，家陣，仲反問廢柴政府，喺架的士上，點解唔准放多部電話，究竟有邊條法律話明唔准一車十幾部電話？

本報獨家揭發的士「一車十三機」的嚇人真事，其實，仲未算恐怖，我坐過部的士，車頭駕駛盤旁有十多廿部電話外，司機位旁的空位，還放咗部「無線發射器」的物體，咁無法無天，真好過分，可恨的，仲有人敢話佢哋都係為咗「搵食」啫！若警方夠膽限制佢哋喺車頭放置手機數目，就係「警逼民反」，必會慢駛遊行示威，睇吓邊個死喎！

香港人幾時變得黑白不分、蠻不講理、虛張聲勢、唔理人家生死，同發窮惡的呢？這不單單係的士行業的單一問題，而係整個香港社會意識急敗的現象，可惜，香港廢柴政府不知事態嚴重！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps