SUN搞作：少膽虫手記：造假改不了
「少膽虫，你打假波！」淫賤黎大叫。少膽虫即刻放低手上電話，雙手往上移，「腦細，我真材實料，童叟無欺！」淫賤黎以雙目打量少膽虫，「你仲狡辯？事實擺在眼前，你明明就係打假波！」《爛果》一向宣淫，唔通淫賤黎已經練成男人最想練到嘅神功─「透視眼」？
「腦細，我今日着到成隻糉咁，咁你都睇到？」少膽虫難以相信。淫賤黎輕托下巴，「少膽虫，你好學唔學學人造假，為咗將你帶返正道，打假波係一定要取締。」只見淫賤黎擺出少林龍爪手嘅架勢，來勢洶洶，少膽虫閉目不忍睹，「腦細，唔好呀……」
到少膽虫再睜開眼之際，淫賤黎已經一手搶咗少膽虫部電話，「都話你喺隻足球game度開外掛喇，邊有可能十一個球員都係路姆西，即刻幫你丟晒佢。」少膽虫頓時鬆一口氣，淫賤黎望望電話，再睥睨少膽虫，「哈，明明係條虫，仲叫自己做『暗黑不死雀』，我依家就整死你隻雀！」
「腦細，你又會知我開外掛嘅？」少膽虫怯問。
「點會唔知，我改到隻game有成十一隻C朗都唔夠你踢，梗係知你開外掛！」淫賤黎說起來毫不羞恥。
睇嚟《爛果》做假，一世都改唔到……
