城中鏡：丁磊劉強東扮嘢氹員工
呢兩年，內地嘅互聯網金融、電商嘅發展真係幾嚇人，聽聞佢哋年尾花紅超勁，就連搞聯歡會，啲老細都好闊綽，又肯放下身段，扮嘢搞氣氛，同班手足玩到癲，無他嘅，呢行咁大發展，留住人才好緊要o架！
劉強東準備咗一百萬人仔現金畀員工抽獎。（資料圖片）
丁磊扮殭屍出席公司年會，認真搞鬼。（資料圖片）
好似網易老闆丁磊，前兩日就扮殭屍，由班清宮娘娘陪住一齊出席公司年會，京東老闆劉強東就着到成個許文強咁，不過，最氹到員工開心嘅，唔係劉總嘅扮相，而係佢帶住上台、準備用來畀大家抽獎嘅一百萬人仔現金。
當年阿里巴巴主席馬雲以白雪公主look娛賓，仍然記憶猶新。不過，講到豪，360公司就更勝一籌，喺年會派出獎金同獎品加埋近二千萬人仔，真係恨死隔籬。
互聯網果然係年輕人嘅世界，百度公司創始人、董事長兼CEO李彥宏尋日嚟咗香港出席論壇，大談互聯網發展，佢話人嘅創造力最高峰係喺三十歲之前，如果佢同啲手下傾大計時，反而會聽後生仔嘅意見去做，佢自爆今年已經四十五歲，加埋馬雲、騰訊主席馬化騰，其實都已經過咗黃金年齡，白啲咁講，即係out咗。好彩佢依家係為興趣，唔係為錢。
