城中鏡：姚明號召有心人行善
籃球壇巨星姚明尋日喺上海出席第十四屆瑞銀大中華研討會嘅首日活動，仲同瑞銀集團首席執行官Sergio Ermotti會面。眾所周知，姚明喺職業生涯結束後致力慈善活動，仲設立咗「姚基金」，佢話希望透過今次研討會吸引更多志同道合嘅人士合作。
姚明同Sergio Ermotti言談甚歡。
Sergio Ermotti話姚明喺職業生涯中一向力求完美，無懼挑戰，咁正正係瑞銀所重視嘅核心理念同價值，又大讚姚明不僅僅係一個令人敬佩嘅運動員，亦係一位慷慨嘅人。除咗設立基金外，同時作為一個企業家及投資者，姚明喺職業生涯中，積極參與慈善籌款活動，亦曾透過參加慈善籃球比賽募捐，用於資助中國嘅貧困兒童。
出席咁大規模嘅年會，姚明先表示榮幸，仲話呢次盛會為專注中國市場嘅投資者指明咗方向。佢又話好高興能夠同瑞銀攜手，共同提升公眾對國內慈善事業嘅認知，而「姚基金」致力於助學興教，改善青少年嘅學習生活，並回報社會，所以佢好希望透過參與研討會，號召更多有愛之士加入基金，共同努力為善。
