城中鏡：王庭聰嫁女 人氣旺
近月政商界名人喜事浪接浪，前日輪到港區全國人大代表王庭聰大女Crystal王麗霞出閣，同金融才俊Jimmy邢高福喺酒店擺婚宴，好多政商界同文化界名人到賀，包括國學大師饒宗頤、特首梁振英、觀瀾湖主席朱鼎健、中港照相器材集團主席孫大倫等，場面相當熱鬧。
王麗霞同邢高福甜蜜滿瀉。
饒宗頤（前）帶同墨寶到賀，後排為新娘王麗霞（左）、行會成員羅范椒芬（中）同王庭聰（右）。
王庭聰契妹李進秋（右）同老公杜東尺送咗一對金鐲畀新人。
朱鼎健咁捧場，原來王庭聰經常到佢嘅觀瀾湖高爾夫球場打波。
講到嫁女，王庭聰就話冇乜特別壓力，最緊要女婿識得尊重人，至於想幾時抱孫，就更加唔急得，仲話依家乜嘢年代，生仔係唔催得喎。結婚係人生大事，Crystal當然緊張得多，仲去咗三個地方影婚紗相。由於到賀賓客非常之多，佢同老公Jimmy忙到成晚滿場飛，影相影到變布景板咁滯，但依然笑容滿面幸福滿瀉。
葉劉中性打扮現身
原來好多名人都同王庭聰好有淵源，好似東區區議員李進秋咁，當日就帶埋一對金鐲送畀Crystal，原來佢係王庭聰契妹，亦即係新娘嘅契姑姐，唔怪得人到之餘亦不忘帶埋厚禮啦。至於饒宗頤亦送咗一副墨寶同字畫畀一對新人，祝佢哋「佳偶天生」。
其他賓客亦悉心打扮，好似行政會議成員葉劉淑儀咁就以中性打扮現身，皆因佢知道新娘本身係做婚禮行業，所以就想特別啲，特登反串嚟打破傳統。立法會議員黃國健亦有到場，問到佢同王庭聰係乜嘢關係時，佢就話自己嘅助理啱啱被王庭聰撬走咗，但佢話係講笑啫，希望佢個女嫁得好先係真嘅。
