政壇：搞搞政：藝策耍公關曾德成招怨
民政事務局喺舊年十一月率先同九大藝團報喜，話嚟緊新一個財政年度開始，每年會增撥超過三千萬元嘅年度額外恒常資助。但有藝團就批評，原來筆錢要好似「一般項目性資助」咁競投，申請手續繁複唔在講，又冇明確嘅批核準則，製造更多問題同混亂，質疑局長曾德成係咪想用三千萬元分化九大藝團。換言之，即係話德成局長製造trouble「茶煲」啦！
設計圖片
九大藝團之一嘅「進念．二十面體」董事會尋日開記招，董事會主席靳埭強（靳叔）話，早前佢哋已向政府反映過九大藝團恒常所需資源，例如藝團人工偏低、無專屬辦公室同排練場地等，但係民政局冇諮詢過九大藝團，就單方面拋出三千萬元資助方案，好明顯當局唔了解文化藝術發展，純粹係派錢耍公關手段、見招拆招了事。
靳叔又大鬧政府咁多年都唔重視文化藝術發展，話香港九七年回歸，文化藝術開支佔經營開支都仲有百分之一，但係去到上一個財政年度已跌到得番百分之零點九。
靳叔話上個財政年度藝術文化開支有三十三億元，帳面上睇落去好似好多，但實際有接近八成開支都落咗康樂及文化事務署個袋，真正資助中小型藝團只得四千萬元，仲要有超過一百個藝團競爭。
佢仲話「進念．二十面體」開會商量過之後，決定放棄申請呢筆三千萬元資助，寧願政府將啲錢改為支持中小型藝團，平均資助額可以激增七成半。長遠當然希望政府喺新一份施政報告或財政預算案宣布好消息，將文化藝術發展開支倍增至六十億元，咁先可以打造藝術國際大都會。
