政壇：議員訪蒲台島關懷缺水電
蒲台島被稱為「香港南極」，因為交通不便，島上居民近年陸續遷出，剩下常住人口只有二十幾人。不過，呢個小小嘅島嶼居然吸引到立法會議員Bill鄧家彪、Alice麥美娟同港燈義工隊去考察。阿Bill話蒲台島多年冇自來水供應之餘，電力公司亦都唔願意在島上鋪設電纜，島上居民要靠發電機應付日常所需。阿Bill同Alice落區連蒲台島都唔放過，印證世界認真難撈。
鄧家彪（右）同麥美娟合力先抽得起桶發電機用嘅電油。（受訪者提供）
兩人一早就搭船入蒲台島視察當地缺水缺電情況，身兼離島區議員嘅阿Bill坦言，仲有唔少老年人喺偏遠島嶼定居，水同電對佢哋嚟講非常重要。有婆婆就投訴發電機供電唔多穩定，試過打風落雨成個星期都冇電，加上平日已經要上山砍柴煲水沖涼，最大心願就係喺屋企裝番個熱水爐。阿Bill同Alice都話首要工作係去信水務署，叫佢哋派人入村清洗水箱，等村民可以飲番啲較乾淨嘅食水喎！
