政壇：比特幣貧富差拍住北韓
虛擬貨幣Bitcoin（比特幣）呢一年嘅發展夠晒戲劇性，有人瞓身日掘夜掘，亦有監管機構喊打喊殺，所以夠guts嘅人至會玩。現時估計全球起碼有一百萬人持有虛擬貨幣Bitcoin，有人計過，當佢係真正貨幣咁計，堅尼系數高達零點八八，貧富懸殊程度拍得住北韓！
花旗貨幣分析師恩蘭德最近根據芬蘭企業家皮耶蒂萊上個月嘅統計推算，喺Bitcoin世界裏面，百分之零點一嘅人擁有百分之五十Bitcoin，百分之一人掌握百分之八十Bitcoin，呢個比率，同帕雷托法則（Pareto Principle），又稱二八定律，真係差好遠。
恩蘭德指Bitcoin世界貧富懸殊之所以咁得人驚，可能係同市場最近憧憬Bitcoin嘅應用會日漸廣泛，觸發Bitcoin身價急升有關。試諗吓，Bitcoin由○八年低調面世，一路去到舊年年頭都被視為異端，吸引唔到資金流入，幾年前率先默默開採Bitcoin嘅人，咪自然受惠最大囉。
話說美國網購平台Overstock上個禮拜四開始接受Bitcoin，開創當地主流零售商嘅先河。身為Bitcoin信徒嘅Overstock行政總裁伯恩宣稱，首日以Bitcoin計價嘅訂單已經高達十三萬美元（約一百零一點四萬港元），仲牙擦到批死同行亞馬遜遲早都要收Bitcoin，因為網購市場每個月以百分之三十嘅高速增長，亞馬遜無理由蠢到唔收Bitcoin，放棄咁大舊肥豬肉喎！
