政壇：公文袋扮鴕鳥難挽民心
以大狀為首嘅公文袋，曾經喺港珠澳大橋、外傭居港權兩宗司法覆核案件期間，支持度插水式下跌，令該黨喺選舉連番失利，連累陳淑莊都入唔到立會。最近有團體進行民調結果發現，除咗佢哋喺九龍東直選嘅黨魁袋巾傑外，其餘四位議員即港島區陳家洛、九龍西「阿毛」毛孟靜、新界西郭家麒同新界東湯家驊嘅評分都直線下跌。如公文袋再唔諗吓點樣挽救，下屆選舉隨時一鋪清袋，到時就喊都無謂喇！
設計圖片
香港研究協會月初訪問一千二百位市民，對三十五位地區直選議員及五位超級議員進行評分，一分最低、六分最高。結果發現大部分錄得評分下跌嘅都係泛民主派議員，反而建制派支持度就普遍上升。當中以公文袋四位議員跌幅最大，陳家洛評分急跌零點四分，係公文袋成績最差嘅一個。而阿毛、郭家麒同湯家驊評分都跌唔少，幸好之前幾次評分唔錯，令排名唔使包尾。
近期公文袋已愈來愈低調，無論係政改問題定係新移民申領綜援一事上，寧願做鴕鳥都唔出聲，唯獨阿毛就參與「香港本土」，倡議特區政府收回內地單程證嘅審批權，實行「源頭減人」，結果備受批評，如果因為阿毛而令黨內議員評分下跌，睇嚟該黨真係要檢討吓喇。
超級議員得分露玄機
至於市民對五位超級議員評分，可讀性甚高，泛民涂謹申同「鐵頭仁」何俊仁嘅評分雙雙下跌，而陳婉嫻同李慧琼兩人評分輕微上升，反而走溫和路線嘅民協馮檢基，評分就維持不變。睇嚟政見愈偏向建制，民望會愈高喎！
