垃圾山以鄰為壑 擴堆填自取其辱
香港垃圾為患，港府無計可施，除咗密鑼緊鼓計劃實施垃圾徵費之外，對擴建堆填區一直死心不息，結果搞到天怒人怨，唔只本港居民強烈反對，連隔鄰嘅深圳居民亦強烈不滿。呢，有深圳市人大代表發起組織「呼籲抵制香港垃圾山簽名活動」，得到深圳居民積極響應，初步統計簽名人數已超過百萬，包括四百幾名當地人大代表及政協委員，你話港府係咪唔衰攞嚟衰吖！
係人都知，香港人均垃圾量幾乎冠絕全球，三個堆填區就快爆滿，港府減廢無方，一味擴建堆填區，港深兩地居民都身受其害，唔反對就假喇。其實，除咗擴建堆填區不得人心，港府計劃實施垃圾徵費亦引起好大爭議o架。環境局局長黃錦星早前誇下海口，揚言實施徵費計劃十年後全港垃圾量可大減四成，又話六成半市民支持垃圾徵費喎，事實係咪咁呢？
嗱，食環署職工權益工會早前做咗個調查，雖然有六成受訪者同意減少垃圾係市民嘅責任，但七成受訪者認為垃圾徵費唔合理，另有六成七人唔認同垃圾徵費可有效減少垃圾。工會亦訪問咗食環署部分唔同職級嘅員工，九成九受訪者認為當局○六年實施建築物廢料徵費後，完全無達到推動環保成效，擔心日後推行垃圾徵費，結果都係一樣；近九成人同意垃圾徵費後，非法棄置黑點將會大增，需要大量人力物力處理。
工會仲話，根據環保署嘅監察報告，○一至一一年期間家居廢物大幅下跌兩成，而同期工商業廢物反而大增七成二，質疑政府一旦推出全民垃圾徵費會偏袒工商業，對市民唔公平，亦達唔到污染者自付嘅原則。
冇錯嘞，垃圾徵費最緊要公平合理，否則隨時引起民意反彈嘅咋。即係咁，「香港是我家，人人都愛它」，相信大部分市民唔介意為環保及減廢出一分力，問題係，畀咗錢之後係咪就可以解決問題呢？答案係未必囉。講到底，源頭減廢唔係一味收錢就得，而係要多管齊下，最重要必須有配套支持。正如回收業人士反映，由於本港配套設施嚴重不足，業界收到廢物後大部分都要送往內地處理，但隨着內地環保意識提高，禁止洋垃圾入口，唔少廢物最後又要送去堆填區，盞嘥氣。所以話，港產官僚口口聲聲重視環保及回收業，根本就係大隻講。
一句講晒，環保人人有責，市民固然要為減廢付出，港府更加責無旁貸，如果唔想香港變成垃圾山或垃圾港，當局真係要認真諗諗計喇，叮！
