SUN搞作：少膽虫手記：邪報換腦腫
「吖，少膽虫呀！《日月邪報》無鬼咗公信第柒啫，家陣又搞乜呀？」淫賤黎尋日開會突然問起，少膽虫無睇新聞、猝不及防，只好隨口噏：「唉，肯定係懼於我《爛果》嘅風高亮節，尤其腦細你對民煮嘅投資同功勞，與天地同壽、與日月同光，所以覺得自己唔配以日月為名……」
「大執位呀腦細。」肥豪條死仔包突然插嘴認叻：「嗰邊腦腫『臨陣逃』要……咔嚓！」肥豪笑騎騎咁對住少膽虫，做咗一下殺頭手勢，少膽虫當堂屁滾尿流，一股涼意籠罩全身，馬上拎手機出嚟扮忙。
「吓！佢咁就死得喇？無先餵狗咩？」淫賤黎問。「腦細，又唔係北韓，」肥豪眼尾一望少膽虫，繼續話：「表現唔好，咪調佢去執書執紙皮啫。」淫賤黎似懂非懂，少膽虫卻感到大禍臨頭。
「係喎！可以換腦腫o架喎！」淫賤黎突然拍少膽虫大髀一下：「點解以前無諗過嘅呢？」危急關頭，少膽虫決定出絕招，拎出手機畀淫賤黎睇：
「如果我哋學《日月邪報》咁講廢話，話《爛果》『曾經歷多次總編輯的轉變，編輯方針始終如一，並不會因人事變動而有所改變』，公關災難之餘，無變就不如咪換啦......」淫賤黎點頭，肥豪奸計落空，哼。
