城中鏡：范統負傷KO對手
百利保首席營運總監Ronald范統能文能武，鍾意打拳嘅佢，最近又贏拳賽，佢右手有傷患兼帶病，仍打贏咗個後生過佢成二十五年嘅對手，拎咗個泰拳獎盃。
范統（左）打贏咗個後生過佢成二十五年嘅對手捧盃。
呢個比賽係Ronald打開泰拳嘅拳館，同海峰環保教育基金合作搞嘅慈善泰拳賽，比賽由十六位嚟自中環財金界嘅業餘拳手參加，以體重分級打八場，每場三回合，同Ronald對打嘅係三十二歲嘅會計師。
Ronald話拳怕少壯，所以賽前勤練氣，結果搞到感冒未清，右手亦有舊患，醫生勸告佢每場只可大約揮出三次右拳，所以佢大部分時間都出左拳，睇準機會先至出右拳，結果第二回合成功重拳擊中對手，第三回合一開場三秒就再被佢以有傷嘅右拳擊倒，十足拍戲咁，對手最後都爬起身捱到完場，但就輸晒點數。
今年將屆五十七歲嘅Ronald話，自從佢師傅冼國林睇中佢骨格精奇，拉佢學散打以嚟，至今一共贏咗三場正式賽事，對手包括大隻過佢嘅海關督察同後生過佢嘅二十三歲青年，用嘅係同工作同一道理「避重就輕」加「將勤補拙」，趁狀態好今年仲想打多兩場公開賽。
佢笑住話仲有一個致勝秘密，就係佢對仔女都到場觀賽，阿仔仲帶埋成班朋友嚟，所以真係「唔衰得」。
