城中鏡：陳細潔爆當年情 怒撇「老爺車男」
鯊魚女Abbie陳細潔為保良局「實現千歲願」安老籌募活動開展禮主持老爺車車隊啟動儀式，佢話呢日嘅主題係懷舊香港，所以安排咗二十多輛老爺車載長者到機場。可有出動私伙車？佢笑住話：「我又唔係老爺，我鍾意老爺車但無儲，因為無地方泊車。」咁男士搵老爺車載佢會唔會得到佢歡心？佢就話：「有品味！好鍾意男仔鍾意古董收藏。」
企喺老爺車前嘅陳細潔，話鍾意收藏古董嘅男仔有品味。
鄺美雲善心爆棚，覺得有能力幫助別人，係最幸福嘅事。
Abbie仲透露二十多年前試過有男士駕駛老爺車嚟載佢，點知中途死火，而且架車係租番嚟嘅，要途中搵人嚟處理，佢話：「嗰時係夏天，我唔係咁怕曬，但架車開篷，被風吹到啲頭髮亂晒。」佢直指嗰個男士租車係「阿茂整餅」，事後亦拒絕咗佢，因為佢唔喜歡人「充大頭鬼」。
鄺美雲護老最樂
另外，喺保良局嘅安老籌募活動開展禮上見到鄺美雲，佢認為有能力幫助別人係最幸福嘅事，又話：「有老人家無能力裝修屋企，生活得唔舒適，保良局好好，會幫助佢，試過有婆婆住間屋有蝨，佢畀蝨咬，於是幫佢屋企滅蝨。」
