政壇：搞搞政：范國威 哪吒為出位狂抽水

政制及內地事務局局長譚志源尋日朝早九時半到西貢區議會，展開首站區議會政改諮詢，外界以為范國威同哪吒呢對「西貢孖寶」定必坐定定爭曝光，點知前者喺會議剛開始先入場，後者竟喺十點四十五分先現身，足足比開始時間遲咗一個多小時。

不過，哪吒一到場就迅速投入角色，趁現場二十八名區議員已發言，隨即半自嘲話平時未獲如此重視，可以一埋位就發言，其他議員聽到自然不是味兒，其中區議會主席吳仕福趁機冷嘲熱諷哪吒，仲因哪吒長篇大論發言而四次熄咪，其後更進一步開火批評此等遲到早退行徑，其實就係做騷，搞到哪吒又再出聲反駁，令會議一度炮聲連連，火藥味甚濃。

會議後哪吒為「遲大到」解畫，聲稱原因係前區議員、藝人劉丹嘅仔結婚，佢要協助證婚工作。不過，哪吒唔係律師，究竟點樣協助呢？

相比哪吒出位行徑，范國威亦非省油的燈，佢前日以立法會議員身份出席政改晚宴時，逗留約半小時後就玩離席抗議「抽水」，有人仲目睹佢離場時先電召的士到場，上演離場抗議劇本，尋日早上更作第二度「抽水」，接受電台訪問時再次講述離席嘅前因後果。難怪事後有人老實不客氣話，佢唔似得「長毛」梁國雄等事前張揚打正旗號缺席晚宴，所以「抽水」行徑騷味極濃。呢對「西貢孖寶」為出位認真「零底線」，相信會有更多精彩場面陸續上演。