以「鬥地主」打出名堂嘅博雅喺舊年十一月招股上市，都威咗一段時間，直至福壽園同信達資產管理出現，風頭至被分薄咗，尋日博雅又成風頭躉喇，皆因《福布斯》中文版發布嘅「中國最具潛力中小企業榜」，中國上市潛力企業一百強中，博雅奪冠，深圳上市嘅東旭光電、海思科分別位列二三。
今年嘅榜單上，最明顯嘅分別係互聯網與移動互聯網、軟件技術等行業處於上升態勢，傳統製造業嘅比重繼續下降，唔怪之得啲手遊股、網絡股炒到癲。就連另一個屬於非上市榜單入面，排頭位嘅愷英網絡，原來都係做社區遊戲起家，依家開始進入到手機遊戲開發嘅領域。
今次奪冠嘅博雅，招股時吸引到七萬七千人認購，五百六十人更屬「頂頭槌」飛，凍資額八百六十八億元，一度成為一三年嘅冠軍，緊隨其後招股嘅福壽園同埋信達，好快就打破博雅嘅紀錄，博雅嘅暗盤價都唔錯，有三成升幅，點知翌日掛牌，高開低收，全日股價僅升百之十三點八，令好多人大跌眼鏡。
能夠入到福布斯潛力企業榜，標準係年銷售額喺一千萬元至十億元人民幣之間、主營業務喺中國大陸嘅中小企業。
第一手消息請下載on.cc東網
