政壇：KK單雞宴後唔認醉駕
率領政改諮詢專責小組嘅政務司司長林鄭月娥，前晚喺山頂白加道官邸舉行政改飯局，邀請十七位立法會議員出席，成餐飯食咗兩個幾鐘，席間仲有紅酒供應添！泛民嘅議員包括白鴿黨「單雞」單仲偕同民協嘅KK馮檢基食完飯出嚟見傳媒，有在場記者就覺得佢哋講嘢反應遲鈍、語無倫次，佢哋兩個之後仲各自揸車離開。唔通佢哋斗膽醉酒駕駛？我哋問番佢哋兩個，單雞話自己唔係飲醉，只係食咗藥啫，而KK就聲稱淨係飲過茶喎！
設計圖片及對白
前晚單雞同KK食完飯出嚟見記者，前者就問一句先答一句，反應遲鈍，後者就講咩「如果阿媽話事，就阿媽做（特首選舉）提名委員會。」搞到在場啲記者都聽到一頭霧水，懷疑佢哋唔知係咪飲大咗。
堅稱一滴都冇飲
單雞堅稱一滴酒都冇飲過，但前日感冒同咳嗽，下午食咗藥，可能因為咁，反應慢咗喎！KK就話因為自己有揸車，所以淨係飲茶，佢嘅「阿媽論」係源於同場嘅議員林大輝話「愛國愛港」如同「孝順」，要「阿媽」承認至得，佢覺得咁即係篩選，先至火起反駁喎！
政改飯局除咗有紅酒外，仲有五餸一湯加甜品生果，菜式分別係粉葛赤小豆鯪魚唐排湯、野菌豆腐、薑米碧綠蝦仁、清蒸海斑、番茄烤肉排同咖喱雞配飯，甜品就係紅豆沙湯圓。飯後，林鄭月娥仲每位議員送咗樽XO醬添！有份出席飯局嘅議員盧偉國就話，雖然菜式睇落係平實啲，但都幾好味，佢就零舍欣賞樽XO醬咁話。
