光影留聲群星哀悼
邵逸夫一手創立的影視王國，培育出不少業界的台前幕後精英。當年狄龍投考邵氏公司的南國演員訓練班，最終成為邵氏當紅小生，他昨晚接受電話訪問，不禁慨嘆說︰「佢已經一百零七歲，惟有講句『息勞歸主』。呢個大老闆和藹可親，對個個都好好，記得有幾年我冇拍戲，帶我去內地探訪同參觀。佢一直保持青春心境，唔喜歡我叫佢老闆，叮囑我叫佢『young man』，為人風趣幽默，係個了不起嘅大人物。」
邵逸夫對新事物都很感興趣。
許冠文難忘當年邵逸夫邀請他演《大軍閥》男主角。
邵逸夫坐在「龍椅」與劇組人員合照。
群星不捨
謝賢
與六叔相識五十多年的謝賢說：「六叔係我尊敬嘅老人家，佢對我哋好好，好錫我哋，佢係電影界嘅老行尊，大家都好尊重佢。」
金漢（左）、凌波
邵氏演員凌波、金漢回顧邵氏年代與邵逸夫互動的點滴，當中凌波提起六叔時更加眼泛淚光。
成龍
成龍曾拍攝了一系列邵氏電影，他難忘邵派出御用「６」號勞斯萊斯座駕接載他到半島酒店傾合約：「當時我話要好多錢先買到架車，六叔就同我講『將來你一定買得起』。
汪明荃
身在外地的汪明荃透過電話表示：「佢開創咗電視業先河，佢嘅堅持睇到個發展，成立咗完善制度，又發掘好多人才，亦睇準時機由電影轉去電視，發揮得咁好有佢獨特見識。」阿姐坦言非常尊敬邵逸夫。
狄龍說邵逸夫平易近人︰「當年返內地衞生設施好差，佢見到只會用國語講句『很特別』，點都唔會講難聽說話，出口傷人。」原來邵逸夫早年更經歷過「九霄驚魂」︰「我同佢出trip坐私人飛機，點知遇上八號風球，機師有信心衝過風眼趕上行程，但要佢做最終決定，佢聽完之後即刻叫衝，好有膽識。」
同樣邵氏出身的岳華自言當年由邵逸夫發掘︰「我第一套拍嘅係《西遊記》，當時孫悟空一角要試鏡，最後決策人係佢，所以我喺影視圈嘅一切，都可以話係邵氏帶畀我嘅。之後我同佢有合約，但佢都畀我出去搵錢，佢係一個大方、有人情味嘅人。」
着重培育編導人才
目前身在武漢拍戲的姜大偉，一九六六年加入邵氏獲大導演張徹賞識，他直言昨早開工時已得悉噩耗︰「邵氏對我哋、對我一生人嘅影響好大，相信唔止我，對所有觀眾都非常…唔知點講，總之好心痛，佢對我嚟講係最尊重嘅人。」
邵氏電影《大軍閥》男主角許冠文難忘當年邵逸夫邀他合作︰「佢打畀我，話想搵我做男主角，但當時我好後生得廿幾歲，但大軍閥要五、六十歲又光頭，我覺得唔啱做，但邵逸夫話頭髮可以再生過，但機會冇第二次，叫我唔好咁傻。」
另外，導演吳思遠入行後的電影基礎知識，都是從邵氏舉辦的南國實驗劇團學回來︰「當時香港冇任何呢方面嘅學校，邵逸夫好着重培育編導人才。佢一個個廠房好認真咁巡視，好記得佢話後生二、三十年，自己而家都會拍電影。佢嘅離世係香港電影界嘅一個損失，佢以前為電影做咗好多貢獻，令影業打好基礎。」
入行時一直効力邵氏的劉偉強回應︰「我一九八一年入公司，嗰時係細路，點夠膽同阿Sir講嘢吖？但喺邵氏我學到好多嘢，參與咗好多電影製作。有年我去印尼出席亞太影展，先有機會同阿Sir同枱食飯，總之冇邵生冇我。邵氏等同影業少林寺，培養咗好多人才，我會永遠懷念佢。」
